Բանաստեղծություններ/ Անտիպ/ Երևանին

ԵՐԵՎԱՆԻՆ

Քո մասին չեմ գրել ոչ մի բան —

Ապրել եմ քեզ հետ,

Քեզ հետ եմ եղել,

Քեզ հետ կլինեմ հավիտյան:

Ինչ որ գրել եմ,

Ինչ որ սիրել եմ,

Ինչ մտորել եմ,

Ինչ մորմոքել եմ`

Քո մեջ եմ գրել,

Քեզնով եմ սիրել,

Քեզնով եմ ցավել,

Քեզ հետ տառապել:

Քո երկու հազար

Յոթ հարյուր տարվա

Ճամփորդն եմ եղել:

19..

Բանաստեղծություններ / Անտիպ /Ղարաբալային

ՂԱՐԱԲԱԼԱՅԻ ԵՐԳԸ

Ես ձեր բալան եմ,

Ղարաբալան եմ,

Մնացածը՝ հեչ,

Վարդ արեք շաղոտ,

Քեֆ արեք խաղով

Երևանի մեջ:

Ես էս եմ որ կամ,

Վարդով ման կգամ

Մինչև կյանքիս վերջ,

Ծնվել եմ վարդով,

Կմեռնեմ վարդով

Երևանի մեջ:

Ես ձեր բալան եմ,

Ղարաբալան եմ,

Մնացածը՝ հեչ:

19՞՞